O Consello Asesor de l'Aragonés ye un organo asesor creyato dintro de o propio Consello d'a Fabla Aragonesa e con bocazión d'estar un serbizio d'asesoramiento lingüistico ta os propios consellers e, por meyo de pautos de colaborazión, ta estituzions, asoziazions, editorials, ezetra.

As fins de o Consello Asesor son abanzar en o prozeso de codificazión de l'aragonés común escrito, asinas como en o prozeso de normatibizazión e normalizazión de l'aragonés.

Os quefers de o Consello Asesor se zentran, más que más, en:

1. Rebisión e correuzión de os testos que publique o Consello d'a Fabla Aragonesa, o mesmo si son publicazions periodicas que libros.
2. Asesoría lingüística, atendendo consultas de consellos de redazión, responsables de publicazions u colezions, autors e consellers en cheneral.
3. Siñalar, por meyo de resoluzions, as endrezeras ta ra millor e más correuta codificazión de l'aragonés común escrito e ta l'aplicazión correuta de as normas graficas.
4. Creyazión e rebisión d'un manual d'estilo ta redautar en aragonés estándar, cuaternando as soluzions aragonesas (en aspeutos foneticos, fonolochicos, graficos, morfolochicos, sintauticos e lesicos), consellando-ne una ta cada contesto u rechistro concreto, e refusando-ne atras por estar estrancherismos, bulgarismos u, simplamén, esconsellables dende o punto de bista lingüistico.
5. Prebar d'apachar as normas e proposizions d'emplego que se baigan aplicando en as publicazions de o Consello d'a Fabla Aragonesa con as d'atras editorials, asoziazions, estituzions, ezetra.

En estar un organo naxito dintro de o Consello d'a Fabla Aragonesa, os suyos miembros son nezesariamén consellers de pleno dreito, trigatos un por un en l'Asambleya Cheneral de o Consello d'a Fabla Aragonesa. Autualmén ye composato por doze miembros: Santiago Bal, Mª Pilar Benítez, Antón Martínez, Miguel Martínez, Chuse Inazio Nabarro, Francho Nagore, Artur Quintana, Paz Ríos, Francho Rodés, Fernando Romanos, Chesús Vázquez e Rafel Vidaller, estando presidén Francho Nagore e secretario Santiago Bal.